Շարժման առաքելությունը

Շարժման առաքելությունը նոր հանրային հարաբերությունների ձևավորումն է, որը հիմնված կլինի բաց և թափանցիկ գործելակերպի վրա: Բոլոր անդամներն, անկախ անդամության վաղեմությունից, ունեն հավասար իրավունքներ և հավասար հնարավորություններ, որոշումներն ընդունվում են քննարկումների ու քվեարկությունների հիման վրա: Առանց փոխադարձ վստահությունն ապահովող մեխանիզմների, հնարավոր չէ արդյունավետ հանրային ու քաղաքական ինստիտուտներ ձևավորել, ինչի ապացույցն է մեր երեսուն տարվա անկախության ժամանակաշրջանը:

Շարժման աշխարհայացքը

Վերջին երեսուն տարում Հայաստանում կուտակվել են բազմաթիվ խնդիրներ, այդ թվում հասարակության մեջ առկա անարդարության զգացողությունը։ Անարդարության զգացողության վրա հիմնված հասարակությունը չի կարող լինել համերաշխ կարևոր խնդիրներում և չի կարող զարգացում ունենալ։ Համարում ենք, որ ամենաառանցքային խնդիրներից մեկը սոցիալական արդարության հաստատումն է։ Մյուս կողմից, չի կարող տնտեսական զարգացում ունենալ այն երկիրը, որտեղ սեփականության իրավունքը պաշտպանված չէ։ Այդ երկու խնդիրները՝ սեփականության իրավունքի պաշտպանությունն ու սոցիալական արդարության հաստատումը, պետք է ներդաշնակ լուծում ստանան։ Վստահ ենք, որ այս հարցում պետությունը պետք է լուրջ միջոցառումներ իրականացնի հանրության տարբեր հատվածներին հաշտեցնելու համար։ Սա միջոցառումների առանձին ծրագիր է ենթադրում:

Հայաստանում առկա փոխադարձ անվստահության մթնոլորտի պատճառներից է ըստ ընդունակությունների սոցիալական վերելակների բացակայությունը: Մենք դա կառուցում ենք Շարժման ներսում ու պետք է տարածենք ողջ Հայաստանում:

Չենք ընդունում արտաքին կողմնորոշումների վրա հիմնված մոտեցումները․ ցանկացած քաղաքականության հիմքում պետական շահն է: Հայաստանը տարածքով, բնակչության քանակով ու ռեսուրսներով չի կարող համարվել որպես ինքնաբավ պետություն։ Առաջնային խնդիրն անվտանգության խնդիրներն են, որը փոխկապակցված է աշխարհաքաղաքական փոփոխվող իրադրության հետ։ Այս առումով մենք բացառում ենք որևէ դոգմայացված արտաքին կողմնորոշում։ Մեր արտաքին քաղաքականության առանցքն է անվտանգության համակարգն ու դրա հետ կապված անվտանգային հարցերը։ Մենք ընտրում ենք դաշնակիցներ ըստ ընդհանուր շահերի ու ստեղծված իրադրության։

Մենք համարում ենք, որ Հայաստանը պետք է լինի ժողովրդավարական երկիր, սակայն ժողովրդավարությունը ներքաղաքական առաջնահերթություն է, իսկ արտաքին քաղաքականությունը չի կարող կառուցված լինել նմանատիպ արժեհամակարգերի վրա։ Այսպիսով, մեր ներքին քաղաքականությունը կառուցվելու է ժողովրդավարական արժեքների վրա, իսկ արտաքին քաղաքականությունը՝ ազգային շահի: